مات الكلام يا اهل الملام نادوا المدام تحدف كفن
صلى القيام خلف الامام قبل السلام ربك أذن
صلوا عليه بعد الصلاه النعش طار ع المقبره
دفنوا الشهيد ولا فيش جديد كل الحديت بات مسخره
راح اللي راح سيبوا الجراح تندب على وش الأذى
شدوا الصوان قبل الأدان
بعد العشا بدأ العزا
شلة حروف وسط الظروف
هربت على غيط الدره
شافها البعيد جاب الحديد
كلبش ايديهم من ورا
ازاي يا واد واحنا ف حداد
تعمل على سيدك دكر
محكوم عليك بالعند فيك ننفيك عشان
شعرك خطر
مات الكلام والا اتولد كل القلوب عايشه ف كبد
ولا فيش خروج م المفرغه طول م العيون غاويه النكد
ولا عاد فانوس ولاعاد فلوس
خلصت خلاص الله جبر
كل الفلوس عند التيوس واسيادنا مش غاويين عِبر
صمد الكلام والا انكسر
شمس الشموس غاويه السفر
حتى البيوت باتت تابوت واسيادنا مش واخدين خبر
ولا فيش حياء ولافيش خِشا
عُشر البطون متكرّشه
والأغلبيه الساحقه تصبح تبات من غير عشا
بدأ الكلام والا انقضا
كل الحروف متجرّده
والنص من فرط الخنوع شد القلوع نحو الرضا
ولا فيش كسوف ولا فيش امل
كل النصوص صابها الملل
وازاي عقول غاويه الخمول
تقدر تطول قمة جبل
ما تصدقيش فيّا الملام
اهل الحرام غاويين حسد
من امتى كان صوت الادان
يشهد بغير واحد احد
الحرف لو كان يوم جبان
يهتف ورا تمثال صنم
الحق لازم يوم يبان
يشهد على سن القلم
مات اللي مات يادي الزمن
ولا عاد مجال غير للشجن
ازاي عيون صابها السكون
تقدر تخون نبض الوطن
ولا عاد حياء ولا عاد ادب
كل الاصول صابها العطب
ولا فيش مجال نصنع رجال
طول م العقول جاهله السبب
كل الجموع غاويه الرجوع
ولا فيش طريق في المنتصف
يا شمال شمال يا يمين يمين
ازاي وفين دربي اتنسف
يا ام الشهيد صمتك عنيد
منحوت على خد الخرس
هو الثبات جنب اللي مات
يقدر على دق الجرس
قال الفؤاد انتي المراد
المهر كام فوق الكفن
ادفع حياه بعد الحياه
وياريت كمان اوفي التمن
………………………………
مات الكلام
مارس 2013
سلامه أبو النجاه
